Concentración contra a “lei trans”

O vindeiro sábado 20 de xuño saímos á rúa para esixir, máis unha vez, a derrogación da #LeyTrans.

A lei trans é inconstitucional. É unha lei anticientífica, antifeminista e antidemocrática e unha trampa que desprotexe as mulleres e a infancia.

Actualización 21 de xuño de 2026:

Manifesto lido durante a concentración:

Compañeiras: 

Hoxe o feminismo galego volve ocupar con firmeza as rúas de Vigo. Estamos aquí, un ano máis, para esixir a derrogación dunha norma inconstitucional, anticientífica e antifeminista: a chamada “Lei Trans”.

Manifestámonos contra a “Lei Trans”, non polo impulso de emocións ou sentimentos de odio ou fobia, como adoitan dicir, senón pola análise feminista. Rexeitamos que as ideas esencialistas e individualistas sobre a “identidade de xénero” substitúan a realidade material do sexo. Opoñémonos a que este dogma se converta na base da lexislación e das políticas públicas, conculcando os dereitos das mulleres.

Debemos telo claro: esta lei é un ataque aos fundamentos do noso Estado de dereito. Substituír o sexo por unha identificación subxectiva non é un avance; é unha trampa que desprotexe as mulleres e a infancia.

• Denunciamos o dogmatismo nas aulas: A “Lei Trans” impón o “xénero sentido” por riba da bioloxía. Isto desmantela a coeducación e substitúea por unha imposición irracional baseada nos estereotipos sexistas. Vulnérase así o dereito a unha educación libre de adoutrinamento que se desprende do artigo 27 da Constitución, ignorando o rigor científico que debe rexer o sistema educativo. Non queremos que os centros de ensino sexan laboratorios de experimentación social.
  ➞ FÓRA DOGMAS DAS ESCOLAS!
  
  
• Denunciamos a industria da explotación de xénero: Estamos ante un mercado médico e farmacéutico na procura de pacientes de por vida. Na Galiza, as derivacións de nenas ás unidades de identidade de xénero subiron un 2.000%. Estanse captando menores vulnerables para unha medicalización irreversible, en clara infracción do artigo 43 da Constitución polo que o Estado ten a obriga de protexer a saúde da poboación e non a entregar a intereses privados. 
  ➞ A INFANCIA NON SE TOCA!
  
  
• Denunciamos a desprotección ante a violencia de xénero: Abondan casos de maltratadores que cambian a mención ao seu sexo no rexistro para fuxir da Lei orgánica  1/2004, do 28 de decembro, de medidas de protección integral contra a violencia de xénero. A muller agredida queda desposuída da protección específica que a ampara, véndose sumida nunha absoluta indefensión. A violencia machista queda borrada dos rexistros mentres o Estado renuncia a combater a raíz estrutural da nosa opresión.
  ➞ O SEXO NON SE ELIXE! A VIOLENCIA MACHISTA NON SE AGOCHA!
  
  
• Denunciamos a manipulación de datos e o borrado estatístico: Ao substituír o dato obxectivo do sexo nos rexistros por unha identidade autodeclarada, aniquílase a fiabilidade de calquera análise da realidade, imposibilitando realizar un diagnóstico certeiro da desigualdade, avaliar as fendas existentes ou deseñar políticas públicas eficaces. Está a chegarse ao extremo de atribuír a mulleres violacións cometidas por homes.
  ➞ NON SON OS NOSOS DELITOS!
  
  
• Denunciamos a invasión de espazos seguros e a inxustiza no deporte: A “Lei Trans” obriga a permitir o acceso a vestiarios, baños, refuxios, prisións e a outros espazos exclusivos de mulleres a persoas do sexo masculino só coa súa autodeclaración, vulnerando o noso dereito á privacidade e á seguridade. Así mesmo, no deporte feminino, a vantaxe biolóxica innegable está expulsando as mulleres de podios e competicións acadadas con décadas de esforzo. 
  ➞ O DEPORTE FEMININO É DAS MULLERES!
  
  
• Denunciamos a resignificación da orientación sexual: Esta lei reduce a orientación sexual a unha atracción por “identidades” e non polo sexo. Estamos asistindo a un acoso sistemático contra lesbianas que reivindican o seu dereito a definir os seus propios espazos e desexos baseándose no sexo, no que non caben os varóns. Este acoso debe parar xa! 
  ➞ NON HAI LESBIANAS CON PENE!
  
  
• Denunciamos a persecución da discrepancia: A través de sancións administrativas desproporcionadas, esta lei pretende calar as feministas e profesionais que se negan a someterse a este dogma. Denunciamos mecanismos antixurídicos como a inversión da carga da proba ou a obriga de claudicar ante a “autodeterminación” baixo ameaza de sanción. Isto supón un ataque frontal á liberdade de expresión e de pensamento recollidas no artigo 20 da Constitución, convertendo calquera crítica feminista, política ou científica en obxecto de persecución legal.
  ➞ NON IMOS CALAR! O FEMINISMO NON CALA, O FEMINISMO LOITA!
  
  

Mentres estas inxustizas se multiplican, o Tribunal Constitucional mantén o debate detido. Non podemos agardar máis! Cada día de parálise institucional é un día máis de vulneración de dereitos e de entrega da saúde das nosas fillas e fillos á industria médica do xénero.

Por iso, desde Vigo, xunto coas compañeiras feministas de todo o Estado, esiximos:

1. A derrogación inmediata da Lei 4/2023, do 28 de febreiro, para a igualdade real e efectiva das persoas trans e para a garantía dos dereitos das persoas LGTBI, pola súa flagrante contradición co Artigo 14 da Constitución. Borrar o sexo oculta a orixe da opresión e vulnera a xerarquía normativa ao supeditar a Lei orgánica 3/2007, do 22 de marzo, para a igualdade efectiva de mulleres e homes, a unha norma de rango inferior aprobada sen o debido debate social.
   
   
2. A derrogación inmediata da lei autonómica 2/2014, do 14 de abril, pola igualdade de trato e a non discriminación de lesbianas, gays, transexuais, bisexuais e intersexuais en Galicia.  Así mesmo, esiximos a paralización inmediata da tramitación do Proxecto de Lei Trans de Asturias e a derrogación de toda a lexislación autonómica que negue a realidade material do sexo.
   
   
3. A retirada inmediata dos protocolos educativos que introducen ideas dogmáticas nos centros de ensino de todos os niveis, desmantelan a coeducación e reforzan os estereotipos sexistas, truncando o libre desenvolvemento da infancia e da mocidade.
   
   
4. A derrogación e revisión urxente dos protocolos sanitarios baseados no modelo afirmativo cego, que impiden o diagnóstico diferencial e que empurran a infancia e a mocidade cara a unha medicalización irreversible e á destrución do seu propio corpo.
   
   
5. Que se recupere na lexislación a perspectiva feminista e o rigor científico. Esiximos políticas baseadas na evidencia material do sexo e non en dogmas que vulneran dereitos, liberdades e a seguridade xurídica das mulleres.
   
   
6. Que o Tribunal Constitucional aplique a xurisprudencia fixada polo Tribunal Supremo do Reino Unido na sentenza de 2025 do caso For Women Scotland. Esiximos que se determine que o concepto de muller debe basearse estritamente no sexo, e que ningunha lei de identidade poida redefinilo.
   
   

Compañeiras, nin as mulleres se borran, nin o sexo se elixe. O feminismo galego resiste e non vai parar ata lograr a derrogación total!

ABAIXO A “LEI TRANS”!

DERROGACIÓN XA!

VIVA A LOITA FEMINISTA!