25 de novembro
Cada 25 de novembro, Día Internacional para a Eliminación da Violencia contra a Muller, multiplícanse os lemas, as declaracións institucionais e os actos simbólicos contra a violencia machista. Porén, unha vez pasa o día, a realidade permanece: a violencia continúa, adopta novas formas e deixa cifras alarmantes ao longo de todo o ano. Os últimos datos confirman unha situación que non mellora: milleiros de denuncias nos xulgados, milleiros de mulleres baixo protección e un preocupante aumento das agresións entre menores. Todo isto evidencia que non estamos ante feitos illados, senón fronte a un fenómeno estrutural que atravesa todos os espazos da vida das mulleres.
Na Declaración sobre a eliminación da violencia contra a muller, aprobada na ONU o 20 de decembro de 1993, defínese “violencia contra a muller” nos seguintes termos: “todo acto de violencia baseado na pertenza ao sexo feminino que teña ou poida ter como resultado un dano ou sufrimento físico, sexual ou psicolóxico para a muller, así como as ameazas de tales actos, a coacción ou a privación arbitraria da liberdade, tanto se se producen na vida pública coma na vida privada”.
Os feminicidios son só a punta do iceberg da violencia recibida polas mulleres polo feito de selo. E a violencia machista non se limita ao ámbito da parella: está no acoso, nas agresións sexuais, no control dixital, na difusión de imaxes sen consentimento, na explotación sexual e nesa normalidade cotiá chea de bromas, xestos e actitudes que reproducen desigualdade. Ante isto, non abonda con campañas rituais nin con xestos baleiros. Neste novo 25 de novembro, desde As Silveiras reclamamos vontade política real, recursos estables, coeducación feminista e un compromiso social que non se apague ao día seguinte. Non queremos máis aparencias: queremos transformación profunda e xustiza para todas as mulleres.
Este 25 de novembro As Silveiras acudiremos á manifestación convocada pola Rede de mulleres veciñais contra os malos tratos de Vigo, que sairá ás 20:00h do cruce con Vía Norte.
Acudiremos xunto as compañeiras doutras asociacións abolicionistas de Vigo. Animádevos a xuntarvos con nosoutras trala faixa do Bloque Abolicionista de Galicia (BAG), esixindo a abolición de todas as formas de violencia que se exercen contra as mulleres e nenas.
