Recuperemos a axenda feminista galega! Encontro con Lupe Ces
O venres 21 de marzo tivemos a honra de recibirmos en Vigo a Lupe Ces, mestra xubilada e activista feminista, cunha longa e intensa experiencia no feminismo galego. Lupe é cofundadora da organización Mulheres Nacionalistas Galegas (MNG), na que traballa actualmente, e foi unha das impulsoras da Marcha Mundial das Mulleres a principios deste século. Representou a Galicia nas accións internacionais organizadas ante a ONU, o Banco Mundial e o Fondo Monetario Internacional, nas cidades de Nova York e Washington. Ninguén mellor ca ela para abordar un tema tan importante para todas nós. Desde As Silveiras, queremos agradecerlle fondamente a súa xenerosidade en achegarse a Vigo para compartir connosco a súa sabedoría feminista.
A charla tiña por título “Recuperemos a axenda feminista galega” e nela Lupe comezou por salientar a urxencia de que as mulleres todas nos organicemos, xa que a sociedade está inmersa nunha ofensiva xeralizada contra todo o que sexa progresista, contra todas as liberdades e dereitos civís. Esta regresión global, representada pola auxe da extrema dereita en todo o mundo, está apoiada nun clima de guerra, que Lupe describiu como a máxima expresión da violencia machista, e cuxa peor cara estamos vendo en Gaza.
A regresión ultraconservadora vén alimentada pola infiltración no movemento feminista da ideoloxía transxenerista, que, baixo unha aparencia de progresismo e de ampliación de dereitos, trae unha volta aos estereotipos sexistas máis resesos e busca, sobre todo, dividir o movemento feminista, usurpalo e afastalo da maioría social. Mentres os gobernos recortan e desmantelan os recursos destinados á protección dos dereitos das mulleres, o transxenerismo está provocando que miles de nenas e mozas inicien un camiño sen retorno de hormonación e mutilación do seus corpos sans, na procura dun alivio para un malestar que ten a súa orixe na opresión patriarcal. E, mentres que o transxenerismo goza do foco nos medios de comunicación e na produción cultural, as feministas que denuncian os estragos que está causando esta ideoloxía cómplice do patriarcado neoliberal, son silenciadas e invisibilizadas, cando non perseguidas e canceladas.
Fronte a isto, Lupe Ces insistiu na necesidade de as mulleres organizármonos para reactivar a loita polos nosos dereitos. Urxe que marquemos unha axenda que vaia máis alá dunha táboa reivindicativa, unha axenda baseada no país pero común a todas as mulleres no mundo. Non podemos caer no erro de pensar que as mulleres dos países desenvolvidos estamos a salvo, que a situación das mulleres noutras latitudes (por exemplo, en Afganistán) é algo do pasado que nunca vai volver. Os dereitos das mulleres nunca están garantidos de maneira permanente. Tamén as mulleres afganas viron desaparecer os seus dereitos máis básicos, como o dereito á educación ou a falar en público.
Lupe lanzou na súa charla a proposta de organizarmos en Galicia unha grande convención abolicionista que sirva para establecermos unha axenda galega fronte a esta regresión global auspiciada pola ultradereita e o transxenerismo. Dende As Silveiras abrazamos esta proposta e manifestamos o noso desexo de poñernos a traballar coas compañeiras das outras asociacións abolicionistas do país para entre todas facérmola posible. Se non é abolicionista, non é feminismo.
