Manifesto abolicionista 8 marzo 2025
O pasado 8 de marzo unímonos as asociacións Redeiras, PFRG, Somos Elas Vigo, Rede de Mulleres contra os malos tratos de Vigo e As Silveiras nunha concentración ás 12 do mediodía en Vigo. Este é o manifesto conxunto que se leu.
Hoxe, 8 de marzo día da muller traballadora as abolicionistas mobilizámonos en toda Galicia e alzamos a nosa voz contra todas as formas de opresión e violencia que sofren millóns de mulleres e nenas en todo o mundo. A forma máis extrema desa violencia son son asasinatos das mulleres, os feminicidios. Mátannos por ser mulleres e deixan ás crianzas sen as súas nais.
Nun sistema capitalista que mercantiliza os nosos corpos, rexeitamos a falsa idea de que a explotación sexual e reprodutiva é unha elección libre e apoderante.
A EXPLOTACIÓN DOS NOSOS CORPOS NON É APODERANTE!
A prostitución, a pornografía, a venda de contido de carácter sexual mediante plataformas dixitais, a comercialización de óvulos e os ventres de alugueiro non son traballo.
- A prostitución perpetúa a violencia extrema contra as mulleres, someténdoas a explotacións brutais que benefician aos proxenetas e putañeiros.
- A pornografía normaliza e promove a agresión sexual, a humillación e a degradación da muller, converténdoa en obxecto de consumo.
- A venda de contido sexual en plataformas dixitais como OnlyFans non é unha alternativa laboral digna, senón unha forma máis de precarización disfrazada de independencia, onde as mulleres máis novas, son empurradas á prácticas cada vez máis denigrantes para sobrevivir.
- A comercialización de óvulos expón as mulleres a riscos graves para a súa saúde, mentres que os ventres de alugueiro desposúen ás nais da súa maternidade e converten aos bebés en produtos adquiribles, perpetuando a desigualdade e favorecendo o tráfico de persoas.
O capitalismo normaliza estas prácticas, ofrecéndoas como unha saída para mozas afogadas pola precariedade e o aumento do custo da vida. Pero non hai liberdade nunha elección marcada pola necesidade e a falta de alternativas.
QUERÉMONOS LIBRES!
O feminismo abolicionista defende que os nosos corpos non son mercadoría. Loitamos por un mundo onde as mulleres non sexan reducidas a obxectos de consumo, senón suxeitos de dereitos, con acceso a traballo digno, independencia económica e vidas libres de violencia.
Non aceptamos que a miseria se disfrace de liberdade nin que se nos diga que vender os nosos corpos é unha opción máis no mercado laboral.
A explotación sexual e reprodutiva non pode ser normalizada nin regulamentada, senón erradicada. Esiximos políticas que garantan salarios dignos, acceso á educación, vivenda e seguridade para que ningunha muller se vexa forzada a mercantilizar o seu corpo para sobrevivir. Queremos medidas reais contra a trata, o proxenetismo e todas as industrias que se lucran coa desigualdade e a violencia de xénero.
Neste día, reiteramos que a nosa dignidade non se vende nin se aluga. O feminismo e a loita que dirixe ás mulleres cara a consecución dos dereitos que continuamente son desprezados en todo o mundo. Aquilo que lexitime a explotación dos nosos corpos non é feminismo e traballa en convivencia co mercado e o patriarcado para entregar a máis nenas e mulleres a ese monstro sen límite que nos violenta e nos degrada.
Pola abolición da prostitución, da pornografía e de todas as formas de violencia contra as mulleres. Polo dereito de todas as nenas e mulleres a ter vidas dignas libres de violencia explotación.
Berramos e continuaremos berrando pola abolición do sistema patriarcal.
SEN ABOLICIÓN, NON HAI LIBERACIÓN!
O feminismo ten como obxectivo a liberación das mulleres como clase oprimida, e para conseguilo é imprescindible rachar coa estrutura do xénero. O xénero é unha ferramenta de opresión que impón normas e roles baseados no sexo para manter a subordinación das mulleres. Non é unha identidade escollida individualmente, senón unha estrutura imposta socialmente, que limita as nosas vidas e perpetúa a desigualdade. A nosa loita é material e política, non unha cuestión de identidade subxectiva.
A ideoloxía queer, ao resignificar o xénero como unha identidade individual, borra a análise material da opresión das mulleres e dificulta a defensa dos nosos dereitos baseados no sexo, exactamente igual que fai a ultradereita negacionista. Isto non só desvía o foco da loita feminista, senón que tamén inutiliza as políticas que buscan garantir os nosos dereitos sexuais e reprodutivos, protexernos da violencia ou asegurar a nosa participación en espazos propios.
A abolición do xénero é imprescindible para acadar a igualdade real. Só rompendo co mandato de xénero poderemos vivir plenamente, sen as limitacións que o patriarcado nos impón por razón do noso sexo.
O FEMINISMO É ABOLICIONISTA
Grazas a todas as que vos achegastes reivindicando, máis unha vez, os dereitos das mulleres e a fin da explotación.
