Charla-coloquio sobre a medicina da diferenza

O xoves 17 de outubro asistimos en Vigo á charla-coloquio “A medicina da diferenza: Enferman igual mulleres e homes?”, a cargo de Amaia Pérez-Izaguirre Urquizu, médica en exercicio que actualmente traballa no PAC de Cerdedo.

A ponente, que conta cunha dilatada experiencia en medicina familiar e comunitaria, repasou algunhas das claves que explican a importancia de aplicar a perspectiva de xénero no exercicio da medicina. As diferenzas biolóxicas entre mulleres e homes fan que unha mesma enfermidade nos afecte de xeitos distintos. Porén, malia que as mulleres representamos o 52% da poboación, o androcentrismo da ciencia médica provoca que se nos siga vendo como unha desviación do patrón masculino. Así, os síntomas especificamente femininos de certas doenzas continúan a describirse como “atípicos”. Un exemplo salientable é o do infarto de miocardio, que nas mulleres se manifesta con síntomas diferentes aos que sofren os homes. Isto ten como consecuencia que, en moitas ocasións, nin a muller nin o propio persoal sanitario que a atende recoñecen a tempo que a paciente está sufrindo un infarto, o que conduce a unha elevada taxa de mortalidade do infarto en mulleres.

Canto ás doenzas especificamente femininas, como a endometriose, Pérez-Izaguirre sinalou que continúan estando moi invisibilizadas, tanto na práctica da medicina coma na investigación. Así mesmo, os procesos fisiolóxicos propios das mulleres, como a menstruación e a menopausia, seguen a ser estigmatizados e medicalizados, xa que isto lle resulta moi rendible ao sistema capitalista.

A doutora Pérez-Izaguirre incidiu tamén na necesidade de aplicar a perspectiva de xénero á investigación dos tratamentos farmacolóxicos, xa que mulleres e homes metabolizamos as medicinas de distinto xeito, debido ás nosas diferenzas biolóxicas. Malia isto, as doses que se prescriben non teñen en conta a variable de sexo.

Ademais das cuestións relacionadas co sexo, a ponente tamén analizou como afecta o xénero á saúde das mulleres. Sinalou que na súa consulta comproba cada día que as mulleres tardamos moito en solicitar atención médica, xa que o mandato de xénero nos socializa na obriga de sermos sufridas e en poñermos o coidado dos demais membros da familia por diante de nós mesmas e as nosas necesidades. Por outra banda, o sexismo da sociedade ten como consecuencia que, cando finalmente acode a unha consulta médica, unha muller teña menos probabilidades que un home de que se lle soliciten probas diagnósticas, xa que os síntomas das mulleres son a miúdo minusvalorados e achacados a patoloxías mentais, como a ansiedade.

A ponente concluíu que é urxente que se forneza formación específica para o persoal sanitario, tanto nas facultades de Medicina como tamén de forma continuada durante o exercicio da profesión. E fixo fincapé en que a destrución premeditada do sistema público de saúde por parte do capitalismo ten consecuencias nefastas para a saúde das mulleres.

Desde As Silveiras, queremos agradecerlle fondamente a Amaia Pérez-Izaguirre Urquizu a súa xenerosidade en compartir connosco a súa gran experiencia profesional e os seus coñecementos sobre este tema tan importante para as mulleres.