Charla-coloquio sobre a prostitución como violencia machista

O venres 4 de outubro asistimos, na Casa das Mulleres de Vigo, á charla “Ningunha muller nace para puta: A prostitución como violencia machista”, a cargo de Ana García Costas.

A ponente, avogada en exercicio, leva vinte e cinco anos dedicada a traballar profesionalmente con mulleres en situación de prostitución. Ademais, é a presidenta de Faraxa, unha organización viguesa herdeira de Alecrín, que continúa o seu incansable labor de asistir ás mulleres prostituídas e loitar contra a explotación sexual. É tamén membra da Asociación de Mulleres Xuristas Themis, a través da cal forma parte da Red Española contra la Trata de Personas.

Na súa intervención, Ana García Costas incidiu na idea de que ningunha muller escolle libremente exercer a prostitución, senón que son as circunstancias socioeconómicas as que conducen a esa situación, ilustrando isto con exemplos de casos que leva atopado na súa dilatada carreira profesional. Tamén revisou a lexislación actual, tanto estatal coma europea, sinalando que nos últimos tempos se produciron algúns pequenos avances na loita contra a trata e a explotación sexual, que confía se consoliden e poidan culminar, algún día, na abolición desta forma extrema de violencia machista.

Dende As Silveiras, agradecémoslle a Ana García Costas a súa magnífica charla e, ao público asistente, o seu gran interese e a súa activa participación no coloquio posterior.